रित्तो अक्सिजन सिलिन्डर भरेर राख्न स्वास्थ्य मन्त्रालयको आग्रह, जोखिम अझै टरिनसकेको मन्त्रालयको भनाइ

२५ जेठ, काठमाडौं– महामारीको जोखिम नटरेको भन्दै स्वास्थ्य तथा जनसंख्या मन्त्रालयले खाली अक्सिजन सिलिन्डर भर्न आग्रह गरेको छ । पछिल्ला केही दिनयता संक्रमणमा कमी आए पनि महामारीको जोखिम नटरेकोले सिलिन्डर भरेर राख्न मन्त्रालयले बताएको हो ।

आज एक विज्ञप्ती जारी गर्दै मन्त्रालयका सहप्रवक्ता डा. समिरकुमार अधिकारीले सिलिन्डरहरु व्यक्तिका घर, टोल, आइसोलेसन सेन्टर र अस्पतालमा भएका रित्ता सिलिन्डर भरेर राख्न अनुरोध गर्नुभएको हो ।

खाली सिलिन्डरहरु समयमै उद्योगमा आइ नपुग्ने गरेको हुँदा आपूर्ति प्रणालीमा असर पर्ने र जटिल संक्रमितलाई अप्ठ्यारो पर्ने भएकाले सिलिन्डर भर्न मन्त्रालयले आग्रह गरेको जनाइएको छ । विज्ञप्तीमा, ‘जुनसुकै व्यक्ति, संस्था, निकायले जुनसुकै बहानामा लैजानुभएको अक्सिजन सिलिन्डर यथाशक्य चाँडो जुन उद्योगको सिलिन्डर हो सोही उद्योगमा भर्नका लागि उपलब्ध गराइदिनुहुन अनुरोध छ’, लेखिएको छ ।

मन्त्रालयले विज्ञप्तीमार्फत अस्पतालहरुले अधिकतम मात्रामा अक्सिजन सिलिन्डर भरेर राख्न, अक्सिजन प्लान्ट÷ट्यांक मर्मत, जडान जतिसक्दो चाँडो गरी पूर्ण क्षमतामा सञ्चालन हुने व्यवस्था मिलाउन पनि भनेको छ।