उपत्यकामा निषेधाज्ञाबारे निर्णय लिन सीडीओहरुको बैठक बस्ने तयारी, अझ खुकुलो हुने

२० असार, काठमाडौं– उपत्यकाको निषेधाज्ञा अझै खुकुलो बनाउँदै थप एक साता लम्बाउने तयारी गरिएको छ ।

अघिल्लो पटक निषेधाज्ञा थप्दा सार्वजनिक सवारीसाधन जोरबिजोर प्रणालीमा चल्ने गरी खुकुलो बनाएको प्रशासनले यसपटक अझ खुकुलो बनाउने तयारी रहेको बताएको छ ।

निषेधाज्ञाबारे निर्णय गर्न उपत्यकाका तीन जिल्ला काठमाडौं, ललितपुर र भक्तपुका प्रमुख जिल्ला अधिकारीहरुको संयुक्त बैठक बस्ने तयारी रहेको छ ।

निषेधाज्ञा लम्ब्याए पनि यसपटक माइक्रो बस र टेम्पो सन्चालनबारे पनि निर्णय गर्ने तयारी छ ।

हाल कायम रहेको निषेधाज्ञा लम्ब्याउन सम्भव भएसम्म आज नभए भोली बिहान सम्ममा बैठक बस्ने गरी निर्णय लिइने काठमाडौंका प्रमुख जिल्ला अधिकारी कालीप्रसाद पराजुलीले बताउनुभयो ।

उपत्यकाका तीन जिल्लाको प्रमुख जिल्ला अधिकारीहरुको बैठकले २५ भन्दा बढी सिट क्षमताका सार्वजनिक सवारी साधनहरु जोर–बिजोरको आधारमा चलाउन दिने निर्णय गरेको थियो ।

कोरोना संक्रमणको ‘चेन ब्रेक’ गर्ने उद्देश्यले उपत्यकामा गत वैशाख १६ देखि संक्रमणका आधारमा चरणवद्ध रुपमा निषेधाज्ञामा कडाइ र खुकुलो पारिदैँ आएको छ ।