प्रकाश ज्वालासहित चार जनालाई पार्टी सदस्य र सांसद नरहने गरी कारबाही गर्ने एमालेको निर्णय

१० बैशाख, काठमाडौँ – नेकपा (एमाले)को राष्ट्रिय महाधिवेशन आयोजक समिति सदस्य प्रकाश ज्वालासहित कर्णाली प्रदेश सभाका ४ जना सांसदलाई पार्टी सदस्य र सांसद् नरहनेगरी कारबाही गरिएको छ।

शुक्रबार बालुवाटारमा बसेको महाधिवेशन आयोजक समितिको बैठकले ज्वाला, अम्मरबहादुर थापा, कुर्मराज शाही र नन्दसिंह बुढालाई एमालेको सदस्य र कर्णाली प्रदेश सभा सदस्य समेत नरहने गरी कारबाही गर्ने निर्णय गरेको हो।

उनीहरूले वैशाख ३ गते कर्णाली प्रदेश सभामा मुख्यमन्त्री एवं माओवादी नेता महेन्द्रबहादुर शाहीका पक्षमा विश्वासको मत दिएका थिए। तीमध्ये थापा, शाही र बुढा मन्त्री नियुक्त भइसकेका छन्।

बैठकले फ्लोर क्रस गर्ने प्रदेश सांसद देवी ओलीलाई थप स्पष्टीकरण सोध्ने निर्णय समेत गरेको छ। ओलीले झुक्किएर विश्वासको मत दिएको भन्दै पछि फिर्ता लिएकी थिइन्।