राजनीतिक अस्थिरकाकै बीच सेयर बजारमा नयाँ रेकर्ड, नेप्से २८ सय माथि

९ जेठ, काठमाडौं– सेयर बजार परिसूचक नेप्सेले हालसम्मकै सर्वाधिक उचाइ चुम्दै नयाँ रेकर्ड बनाएको छ । साताको पहिलो दिन आइतबार नेप्से २८ सय २० विन्दुमा पुग्दै रेकर्ड कायम गरेको हो ।

संसद विघटन र राजनीतिक अस्थिरका कारण बजारमा ‘प्यानिक सेल’ हुने आँकलन गरिए पनि बजार ऐतिहासिक रेकर्ड चुम्दै बन्द भएको हो ।

परिसूचक नेप्से बजार खुलेको १० मिनेटमा नै करिब ५० अंकले घटेको थियो । यद्यपि घटेको बजार त्यसपछि भने सम्हालियो । अन्ततः बजार परिसूचक सम्हालिदैँ ३२ दशमलव ८१ अंकले बढेर २८ सय २० अंकमा पुगेर बन्द भएको थियो ।

आज सेयर बजारमा २२० कम्पनीको ११ अर्ब ६९ करोड ५० लाख ३४ हजार ७ सय २८ रुपैयाँको कारोवार भएको थियो । बजारमा आज सबैभन्दा धेरै बढ्नेमा विकास बैंक र फाइनान्स समूह रहेका थिए ।