बैतडीमा जीप दुर्घटनाः दुईको मृत्यु, १० घाइते

२० असार, काठमाडौं– बैतडीमा जीप दुर्घटना हुँदा दुई जनाको मृत्यु भएको छ भने १० जना घाइते भएका छन् ।

डडेल्धुरातर्फ आउँदै गरेको से १ ज ७३९ नम्बरको जीप आइतबार बिहान बैतडीको सिगास गाउँपालिका–३ लगनमा दुर्घटना भएको हो ।

दुर्घटनामा परी मृत्यु हुनेमा सिगास गाउँपालिका–३ का ४५ वर्षीय मान सिंह सावद र ६४ वर्षीय राम सिंह धामी रहेको जिल्ला प्रहरी कार्यालयका प्रमुख प्रहरी नायब उपरीक्षक रमेश पालले बताए ।

यस्तै घाइतेमध्ये ४ जनाको अवस्था गम्भीर रहेको उनले बताए ।

सिगास गाउँपालिका ३ कै १८ वर्षीय योगेन्द्र धामी, १३ वर्षीय लक्ष्मण धामी, ४५ वर्षीय जयसिह धामी र ४० वर्षीय गौमती साउदको अवस्था गम्भीर रहेको छ । प्रहरीका अनुसार उनीहरुलाई उपचारका लागि डडेल्धुरा अस्पताल पठाउने तयारी भइरहेको छ ।

जीप सडकबाट करिब ५० मिटर तल खसेको छ ।