छोटो समयमै सकियो प्रतिनिधिसभाको बैठक

११ आश्विन,काठमाडौं – प्रतिनिधिसभाको आज बसेको बैठक ६ मिनेटमै सकिएको छ । नेकपा एमालेका सांसदहरुको नाराबाजीका बीच बैठक केहीबेर चलेर स्थगित भएको हो ।

बैठकलाई सम्बोधन गर्दै सभामुख अग्निप्रसाद सापकोटाले नियमित रुपले बैठक अवरुद्ध गर्दा विभिन्न महत्त्वपूर्ण विषयमा छलफल हुन बाधा व्यवधान पुगिरहेकोतर्फ ध्यानाकर्षण गराउनुभयो।

उहाँले सभा सञ्चालनका लागि सहयोग गर्नु हामी सबैको समान दायित्व रहेको भन्दै सभामा आफ्ना कुराहरु राखेर बैठकलाई सुव्यवस्थित तरिकाबाट सञ्चालन गर्न आ–आफ्ना आसन ग्रहण गरी सहयोग गर्न अनुरोधसमेत गर्नुभएको थियो।

एमाले सांसदहरुको नाराबाजीकै बीच उनले राष्ट्रपतिको कार्यालयबाट विनियोजन विधेयक पारित भएको सम्बन्धी प्राप्त सूचना पढेर सुनाउनुभएको थियो ।प्रतिनिधिसभाको अर्को बैठक असोज १४ गते बस्ने गरी तोकिएको छ।