‘संविधान रक्षाका लागि श्रमिकहरु एकजुट हुनुपर्ने’ः विभिन्न श्रमिक संगठन

१४ जेठ, काठमाडौं– विभिन्न श्रमिक सङ्घ सङ्गठनले संविधान रक्षाका लागि देशभरका श्रमिक एकजुट हुनुपर्ने बताएका छन् ।

नेपाल ट्रेड युनियन कांग्रेस, अखिल नेपाल ट्रेड युनियन महासङ्घ, पेशागत महासङ्घ नेपाल, राष्ट्रिय प्रजातान्त्रिक ट्रेड युनियन महासङ्घ, समावेशी ट्रेड युनियन महासङ्घ, समाजवादी ट्रेड युनियन महासङ्घ र राष्ट्रिय प्रजातान्त्रिक ट्रेड युनियन महासङ्घ नेपालले संयुक्त विज्ञप्ति जारी गरी नेपाली जनताको लामो त्याग, सङ्घर्ष र बलिदानबाट प्राप्त सङ्घीय लोकतान्त्रिक गणतन्त्र नेपालको संविधानको रक्षाका लागि जुट्नुपर्ने बताएका हुन् ।

नेपाल ट्रेड युनियन कांग्रेसका उपाध्यक्ष अजयकुमार राईले संविधानको मूल्य, मान्यता र भावना विपरीत सरकारले यही जेठ ८ चालेको कदमले मुलुकलाई थप अनिश्चितता र अन्योलतर्फ धकेलेको बताउनुभयो । श्रमिक सङ्घ सङ्गठनहरुले धेरै श्रमिकले अक्सिजन, भेन्टिलेटर, औषधि र आइसियु श्यया नपाएर अकालमा ज्यान गुमाउनु परेको भन्दै जनताको उपचारका लागि ध्यान दिन सरकारसँग आग्रहसमेत गरेको छ । निषेधाज्ञाको समयमा हजारौँ श्रमिकको जागिर गुमेको भन्दै समस्यामा परेका श्रमिकलाई राहतको व्यवस्था गर्नसमेत श्रमिक सङ्घ सङ्गठनले माग गरेका छन् ।