महिलामाथिहुने कुनै पनि हिंसा क्षम्य नहुने प्रधानमन्त्री ओलीको भनाइ

१६ जेठ, काठमाडौं– प्रधानमन्त्री केपी शर्मा ओलीले महिलामाथि हुने कुनै पनि हिंसा क्षम्य नहुने बताउनुभएको छ ।

तेस्रो राष्ट्रिय महिला अधिकार दिवसको अवसरमा आयोजित कार्यक्रममा सम्बोधन गर्दै उहाँले सरकारले महिलामाथि हुने हिंसाविरूद्ध काम गरिरहेको पनि बताउनुभयो ।

प्रधानमन्त्री ओलीले महिला हिंसा, बलात्कार, कुटपिट, अपमान, गालीबेइज्जती, कूप्रथा र कूचलनविरूद्ध संघर्ष जारी रहेको बताउनुभयो ।

उहाँले भन्नुभयो, ‘हाम्रा आमा दिदी बहिनीहरूलाई बोक्सीको आरोप लगाउने जस्तो भ्रम र अन्धविश्वास छ, जानीजानी, स्वार्थ, अहंकार र पछौटेपन जे भए पनि क्षम्य हुन सक्दैन । ’

महिला हकअधिकारको आन्दोलन महिलाको मात्र हो भनेर पुरुषले सोच्नुनहुने बताउँदै प्रधानमन्त्री ओलीले सरकारले बलात्कार र एसिड आक्रमणका विरूद्ध कानुन निर्माण गरेर काम गरिरहेको पनि बताउनुभयो ।