एटीएम मेसिन तोडफोड गर्दागर्दै एक पक्राउ

२७ जेठ, काठमाडौं– प्रहरीले एटिएम मेशिन तोडफोड गर्ने क्रममा एक जनालाई पक्राउ गरेको छ ।

प्रहरीले मेशिन काठमाडौं महानगरपालिका–५ भाटभटेनी चोकमा रहेको सांग्रिला डेभलपमेन्ट बैंकको एटिएम मेसिन तोडफोड गर्दागर्दै एकजनालाई पक्राउन गरेको हो । पक्राउ पर्नेमा डडेल्धुरा सेतीबेशी गाउँपालिका–४ घर भएका २१ वर्षीय दिनेश क्षेत्री रहेको प्रहरीले जनाएको छ । उनलाई प्रहरीले बुधबार राति पक्राउ गरेको हो ।

उनलाई एटिएम तोडफोड गर्दै गरेको अवस्थामा महानगरीय प्रहरी वृत्त मालिगाउँको टोलीले चोरीमा प्रयोग हुने औजार सहित पक्राउ गरेको हो ।

प्रहरीले यस विषयमा थप अनुसन्धान अघि बढाएको जनाएको छ ।