ट्याङकरमा लुकाएको अवैध लागूऔषधसहित बाराबाट दुईजना पक्राउ

१३ जेठ, बारा– प्रहरीले बाराको जितपुरसिमरा उपमहानगरपालिका–१ पथलैया चोकबाट ना.४ ख २९७९ नम्बरको ट्याङकरमा लुकाई राखेको २ सय १८ किलोग्राम अवैध लागूऔषध गाँजा सहित चालक र सहचालकलाई पक्राउ गरेको छ ।

काठमाडौंबाट भारतको बरौलीमा तेल लिन जान लागेको उक्त ट्याङ्करमा अवैध लागूऔषध गाँजा लुकाई राखेको सूचना प्राप्त भएपछि प्रहरी चौकी पथलैयाबाट खटिएको प्रहरीले ट्याङकरको च्याम्बरभित्र लुकाएको गाँजा फेला पारेको हो । च्याम्बरभित्र १९ पोकामा गाँजा भेटिएको प्रहरिले जनाएको छ ।

पक्राउ पर्नेहरूमा ट्याङ्करका चालक महोत्तरी बर्दिवास नगरपालिका–८ बस्ने ३३ वर्षीय घनश्याम गिरी र सहचालक चितवन खैरहनी नगरपालिका–२ बस्ने राजकुमार दवाडी रहेका छन् ।

जिल्ला प्रहरी कार्यालय बाराले यस विषयमा थप अनुसन्धान गरिरहेको जनाएको छ ।