संसद विघटनविरुद्धका मुद्दामा प्रधानन्यायाधीश जबराको नेतृत्वमा संवैधानिक इजलास गठन

१४ जेठ, काठमाडौं– संसद विघटन विरुद्धका रिटहरुमा प्रधानन्यायाधीश चोलेन्द्र शमसेर जबराको नेतृत्वमा संवैधानिक इजलास गठन भएको छ ।

इजलासमा न्यायाधीशहरु दीपककुमार कार्की, आनन्दमोहन भट्टराई, तेजबहादुर केसी र बमकुमार श्रेष्ठ रहेका छन् ।

संवैधानिक इजलासमा परेका रिटहरुमा आज (शुक्रबार) देखि नै सुनुवाइको तयारी रहेको सर्वोच्च अदालत स्रोतले जनाएको छ ।

सर्वोच्चमा संसद विघटन विरुद्धका ११ वटा रिट संवैधानिक इजलासमा रहेका थिए । यद्यपि हिजो प्रधानन्यायाधीश चोलेन्द्र शमशेर जबराको एकल इजालासले यसै सँग सम्बन्धित अन्य रिटहरुको पनि गम्भीर संवैधानिक व्याख्या गुर्नपर्ने भन्दै अन्य १९ रिट पनि संवैधानिक इजलासको जिम्मा लगाएको थियो । यी सबै रिटको सुनुवाइ अब संवैधानिक इजलासले गर्नेछ ।

यसअघि गत पुस ५ गते विघटन गरिएको संसद विघटनलाई संवैधानिक इजलासले खारेज गरिदिएको थियो ।