प्रतिनिधिसभा विघटनविरुद्धको रिटमा गठन भएको संवैधानिक इजलासमा ११ न्यायाधीश नराख्न माग

२१ जेठ, काठमाडौं– संसद विघटनविरुद्धको रिटको संवैधानिक इजालसमा सर्वोच्च ११ जना न्यायाधीशलाई नराख्न माग गर्दै निवेदन परेको छ । अदालतमा रहेको संसद विघटनविरुद्धको रिट सुनुवाइ गर्ने बेञ्चमा ११ जना न्यायाधीशलाई नराख्न निवेदन दिइएको हो ।

धेरै जना न्यायाधीश राख्दा रिट सुनुवाइमा स्वार्थ बाझिने भन्दै अधिवक्ता राजाराम घिमिरेले निवेदन दिनुभएको हो । यद्यपि निवेदन अहिलेसम्म दर्ता हुन बाँकी रहेको उहाँले बताउनुभयो ।

अधिवक्ता घिमिरेले संवैधानिक इजलासमा रहेका न्यायाधीश दीपककुमार कार्की, मीरा खड्का, हरिकृष्ण कार्की, विश्वम्भर श्रेष्ठ, ईश्वर खतिवडा, आनन्दमोहन भट्टराई, अनिलकुमार सिन्हा, प्रकाशमान सिंह राउत, सपना मल्ल प्रधान, तेजबहादुर केसी र बमकुमार श्रेष्ठलाई नराख्न माग गरेका हुन् ।

सर्वोच्चमा अहिले इजलास गठन विवादका कारण संसद विघटनसम्बन्धी ३० रिट विचाराधीन छन् ।

अदालतमा यसअघि परेका विभिन्न रिटमा प्रधानमन्त्री केपी शर्मा ओलीको विपक्षमा तथा रिट निवेदकको पक्षमा फैसला गरेकाले अधिवक्ता घिमिरेले अहिले उनीहरुबाहेक अरु न्यायाधीश राखेर इजलास गठन गर्नुपर्ने माग गर्नुभएको हो ।