युरोकप २०२१ः तीन पटकको च्याम्पियन स्पेन बलियो स्वीडेनसँग भिड्दै, आज पनि तीन खेल हुँदै

३१ जेठ, काठमाडौं– युरोकपको जारी १६औं संस्करण अन्तर्गत आज समूह चरणका तीन खेल हुँदैछ । जारी प्रतियोगितामा आज समूह डी को एक तथा समूह ई को दुई खेल हुन लागेका हुन् ।

आज हुने खेलहरुमा प्रतियोगिता अन्तर्गतको पहिलो खेलमा समूह डी का चेक रिपब्लिक र स्कटल्याण्डबीच प्रतिस्पर्धा हुँदैछ । नेपाली समयअनुसार सो खेल साँझ ६ः४५ देखि सुरु हुनेछ ।

यस्तै आजै हुने दोस्रो खेलमा समूह ई मा रहेको पोल्याण्ड र स्लोभाकियाबीच खेल हुनेछ । उक्त खेल नेपाली समयअनुसार राति ९ः४५ बजे रुसको सेन्ट पिटर्सवर्ग स्टेडियममा हुनेछ ।

यता आजै हुने अन्तिम खेलमा सर्वाधिक तीन पटकको च्याम्पियन स्पेनले स्वीडेनसँग खेल्दैछ । स्पेन र स्वीडेनबीचको खेल राति १२ः४५ बजे देखि स्पेनको घरेलु मैदान स्टेडियो डे ला कार्टुजामा सुरु हुनेछ ।

स्पेन आफ्ना कप्तान सर्जियो बुस्केट बिना मैदानमा उत्रनेछ । स्पेनका कप्तान बुस्केट यतिबेला कोरोना संक्रमणका कारण अहिले सेल्फ आइसोलेसनमा छन् र खेल खेल्ने छैनन् ।

यस्तै कोरोना संक्रमणबाट मुक्त भएका डिएगो लरेन्टे भने खेल्न सक्नेछन् । स्वीडेनका डेजान कुलुसेभ्सी र माथियस स्भानवर्ग पनि कोरोनाका कारण खेलबाट वञ्चित हुनेछन् ।