अडियो सामाग्री सुन्न सकिने विशेषता थप गर्दै फेसबुक

एजेन्सी– फेसबुकले आगामी जुन २२ देखि नयाँ विशेषता थप्ने तयारी गरेको छ ।

विश्वभरि लोकप्रिय सामाजिक सञ्जाल फेसबुकमा अडियो सामाग्री सुन्न सक्ने विशेषता थप्ने तयारी गरेको अधिकारीहरुले जनाएका छन् ।

कम्पनीले गत अप्रिलदेखि नै यो नयाँ विषेशताका बारेमा परीक्षण गरेको थियो थियो । परीक्षणका क्रममा नतिजा सन्तोषजनक र सकारात्मक आएपछि पूरै तयारीका साथ फेसबुकले नयाँ विशेषता थप्न लागेको हो ।

थप्न लागेको नयाँ विशेषतालाई फेसबुकले ‘पोडकास्ट’ नाम दिने जनाइएको छ । पोडकास्ट सेवा थपिएछि फेसबुक एपमा नै सिधै अडियो सामग्रीहरु सुन्न मिल्ने फेसबुकले जनाएको छ ।

पोडकास्टमा आउने अडियोलाई फेसबुकको न्युजफिडमै पोस्ट गर्न मिल्ने र त्यहीँ बजाएर सुन्न मिल्ने व्यवस्था हुने कम्पनीले जनाएको छ । यस्तै फेसबुक पेजमा अडियो पोस्ट गरेपछि पेजका फलोअर्सलाई नोटिफिकेसन पनि जाने भएको छ ।