६५ वर्ष माथिका ज्येष्ठ नागरिकलाई तत्काल कोभिशिल्डको दोस्रो डोज देऊः सर्वोच्च

८ असार, काठमाडौं– कोभिशिल्ड खोपको पहिलो डोज खोप लगाएका ६५ वर्ष माथिका ज्येष्ठ नागरिकलाई तत्काल दोस्रो डोज खोप दिन सर्वोच्च अदालतले सरकारका नाममा अन्तरिम आदेश दिएको छ ।

न्यायाधीश ईश्वर खतिवडाको एकल इजलासले कोभिशिल्डको पहिलो डोज लगाइसकेका ज्येष्ठ नागरिकलाई दोस्रो डोज खोप व्यवस्था गरी तत्काल उपलब्ध गराउन अन्तरिम आदेश जारी गरेको हो ।

६५ वर्ष माथिका ज्येष्ठ नागरिकलाई खोप माग्दै अर्जुनराज गिरीसमेतले सर्वोच्च अदालतमा रिट दायर गरेका थिए । सोही रिटमा सुनवाइ गर्दै सर्वोच्चले सरकारका नाममा कारण देखाउ आदेश र तत्काल खोप उपलब्ध गराउन अन्तरिम आदेश दिएको हो ।

भारतको सेरम इन्ष्टिच्युटद्वारा उत्पादित कोभिशिल्ड खोपको दोस्रो डोज नेपालले ल्यान नसक्दा पहिलो डोज खोप लगाइसकेका ज्येष्ठ नागरिक दोस्रो डोज खोप लगाउन पाएका छैनन् ।