संसद विघटनः विपक्षीको बहस सुरु

१४ असार, काठमाडौं– संसद विघटनविरुद्ध सर्वोच्च अदालतमा दायर भएको रिटमा रिटका विपक्षीको तर्फबाट बहस सुरु भएको छ ।

संवैधानिक इजलासमा जारी सुनुवाइमा रिटका पक्षकाको तर्फबाट बहस सकिएसँगै आजदेखि विपक्षी तर्फको बहस सुरु भएको हो ।

रिटको विपक्षीतर्फको बहसको सुरु प्रधानमन्त्री केपी शर्मा ओलीका तर्फबाट महान्यायाधिवक्ता रमेश बडालले सुरु गरेका छन् । महान्यायाधिवक्ता बडाललाई बहसका लागि ३ घण्टाको समय दिइएको छ ।

यस्तै विपक्षीका तर्फबाट पूर्व महान्यायाधिवक्ताद्वय सुशील पन्त र अग्नि खरेलले पनि आज नै बहस गर्ने जनाइएको छ।

बहसको लागि रिटका पक्ष र विपक्ष दुवैलाई १५÷१५ घण्टा समय दिइएको छ।

रिट निवेदनको पक्षकाले बहुमत सांसद सहित प्रधानमन्त्रीको दाबी प्रस्तुत गरेका कांग्रेस सभापति शेरबहादुर देउवालाई प्रधानमन्त्री नियुक्त गर्न आदेश माग गरेका छन् ।

सरकार गठनका लागि बहुमत सांसदको दाबी हुँदाहुँदै पनि संसद विघटन गर्नु गलत रहेको रिटका पक्षकाको तर्क छ ।

रिटको पक्षबाट बहस गर्ने कानुन व्यवसायीहरुले राष्ट्रपति विद्यादेवी भण्डारीको भूमिकामाथि पनि प्रश्न उठाएका थिए ।

रिटको पक्षमा ३६ जना कानुन व्यवसायीहरुले बहस गरेका थिए ।