उपत्यकाको निषेधाज्ञाः जोर–बिजोर प्रणाली हट्यो, परीक्षा सञ्चालनको बाटो खुल्यो

२० असार, काठमाडौं– उपत्यकाको जारी निषेधाज्ञा असार २२ देखि लागू हुनेगरी असार मसान्तसम्मका लागि थप गरिएको छ ।

हाल उपत्यकामा कायम रहेको निषेधाज्ञा असार २१ गते मध्यरातिदेखि सकिँदैछ ।

थपिएको निषेधाज्ञामा पहिलेभन्दा केही क्षेत्रलाई खुकुलो बनाइएको छ ।

उपत्यकाका तीन जिल्ला सीडीओहरुको बैठकले थपिएको निषेधाज्ञामा सार्वजनिक सवारीसाधनमा लगाइँदै आएको जोर–बिजोर प्रणली हटाइएको छ ।

यस्तै ‘अब सफा टेम्पो र निलो माइक्रो पनि सञ्चालन गर्न पनि तेर्सो सिटमा ४÷४ जना राखेर सञ्चालन गर्न पाइने काठमाडौंका प्रमुख जिल्ला अधिकारी कालीप्रसाद पराजुलीले बताए । यद्यपि टेम्पो र नीलो माइक्रोको हकमा मध्य भागमा दुईतर्फी यात्रुहरुलाई छेक्ने गरि प्लास्टिकको छेकबार लगाउनुपने र अन्य सवारीसाधनले पालना गर्दै आएका सम्पूर्ण नियम पनि पालना गर्नुपर्ने उनले बताए ।

यस्तै माइक्रो र अन्य सार्वजनिक सवारी साधनको हकमा पुरानै व्यवस्था कायम गरिएको भएता पनि जोर–बिजोर प्रणाली भने हटाइएको पराजुलीले बताए ।

उनले भने, ‘सभा, सम्मेलन तथा गोष्ठी भौतिक उपस्थितिमा गर्नुपर्ने भएमा २५ जनाभन्दा बढी भेला नभई गर्न पाइने व्यवस्था गरिएको छ । यस्तै परीक्षाको हकमा परीक्षास्थल तथा कोठाको आधारमा २५ जना भन्दा बढी राख्न नपाइन व्यवस्था गरिएको छ । परीक्षाको हकमा सो भन्दा बढी मानिस एकैदिन जम्मा गर्नुपर्ने भएमा सिफ्टअनुसार एउटा सिफ्ट सबै व्यक्ति गइसकेपछि मात्र अर्कोको गराउनुपर्ने तथा मास्क र सेनिटाइजरको प्रयोग गर्नुपन व्यवस्था गरिएको छ ।’

अन्य क्षेत्रमा भने थपिएको निषेधाज्ञापनि पुरानै व्यवस्था कायम गरिएको उनले बताए ।

उपत्यकामा लम्ब्याइएको निषेधाज्ञा असार २२ गतेदेखि असार मसान्तसम्म लागू हुनेछ ।

यस्तो छ उपत्यकामा असार २२ देखि लागू हुने निषेधाज्ञाको पूर्णपाठः