अवैध लागूऔषधसहित दुई पक्राउ, दुई जना फरार

२२ असार, काठमाडौं– प्रहरीले अवैध लागूऔषध गाँजासहित सुनसरीबाट दुई जनालाई पक्राउ गरेको छ ।

प्रहरीले बराहक्षेत्र नगरपालिका–८ सुक्रबारेबाट करिब १ सय ५० किलो अवैध लागूऔषध गाँजा र १ थान नक्कली पेस्तोल सहित २ जनालाई सोमबार राति पक्राउ गरेको हो ।

पक्राउ पर्नेहरुमा सोही ठाउँ बस्ने २२ वर्षीय भुपेन राय र सुनसरी रामधुनि नगरपालिका–७ बस्ने २५ वर्षीय अमिर लिम्बु रहेको प्रहरीले जनाएको छ ।

चतराबाट कोशी बाँध हुँदै सवारी साधनमा गाँजा लैजादै गरेको सूचना पाएपछ ईलाका प्रहरी कार्यालय महेन्द्रनगरबाट खटिएको प्रहरीले को.२ च ११२ नम्बरको भ्यान र को.२ प ३५०२ नम्बरको मोटरसाइकललाई जाँच गर्ने क्रममा उक्त गाँजा र नक्कली पेस्तोल सहित फेला पारी मोटरसाइकल र भ्यानमा सवार उनीहरुलाई पक्राउ गरेको हो।

भ्यान चालक र मोटरसाइकल सवार १ जना फरार रहेको प्रहरीले जनाएको छ । प्रहरीले उनीहरुको खोजी गरिरहेको छ ।