जाँदाजाँदै ओली सरकारको कोसेलीः सार्वजनिक सवारीसाधनको भाडामा २८ प्रतिशत सम्म वृद्धि

३० असार, काठमाडौं– सार्वजनिक सवारीको भाडादर भारी वृद्धि भएको छ ।

यातायात व्यवस्था विभागले सार्वजनिक सवारीको भाडादरमा २० देखि २८ प्रतिशम्मको भारी वृद्धि गरेको हो ।

वृद्धि भएको भाडाअनुसार सार्वजनिक यात्रुबाहक सवारीको भाडा सबैभन्दा बढी २८ प्रतिशतले बढेको छ। यो भाडादर अन्तरप्रदेश चल्ने लामोदूरीका सवारीसाधनमा लागू हुने बताइएको छ ।

यता मालवाहक सवारीको भाडादरमा पहाडी बाटोमा सञ्चालन हुने सवारीको हकमा २० प्रतिशत र तराईको बाटोमा सञ्चालन हुने सवारीको हकमा २६ प्रतिशतले वृद्धि गरिएको विभागले जनाएको छ ।

विभागले सार्वजनिक यातायात सञ्चालनसँग सम्बन्धित लगानी तथा खर्च समबन्धमा विभागले गरेको बजार अध्ययन, विश्लेषण, सरोकारवाला पक्षसँग गरिएको परामर्शका आधारमा भाडा समायोजन गरिएको बताएको छ ।

श्रमिकको पारिश्रमिक, इन्धन, टायर, ब्याज, सञ्चालन खर्च, ह्रासकट्टी र सञ्चालन मुनाफा लगायत मुख्य सूचकहरूमा देखिएको मूल्यवृद्धिको आधारमा भाडामा समायोजन गरिएको विभागको भनाइ छ।

भौतिक पूर्वाधार तथा यातायात मन्त्रालयले असार २७ गते यससम्बन्धी प्रस्तावमा दिएपछि भाडा वृद्धि गरिएको विभागले जनाएको छ ।