साउन २७ गतेसम्मकालागि लम्ब्याइयो काठमाडौंमा निषेधाज्ञा

१९ साउन, काठमाडौं– काठमाडौंमा जारी निषेधाज्ञा थप एक साताका लागि लम्ब्याइएको छ । जिल्ला प्रशासन कार्यालय काठमाडौंले साउन २७ गतेसम्म निषेधाज्ञा थप गरेको हो ।

मंगलबार काठमाडौंका प्रमुख जिल्ला अधिकारी कालीप्रसाद पराजुलीद्वारा जारी आदेशमा साउन २१ गतेदेखि साउन २७ गतेसम्म निषेधाज्ञा जारी रहने उल्लेख छ ।

थपिएको निषेधाज्ञामा सभा, सम्मेलन, पार्टी प्यालेस, सिनेमा हल, रेष्टुरेन्ट, डान्सबार, दोहोरी, नाचघर, क्लव, स्वीमिङ पुल, मनोरञ्जन स्थान, संग्रहालय, रंगशालामा हुने दर्शक सहितको खेलकुद र मानिसको भीडभाड हुने अन्य कार्यक्रम सञ्चालन गर्न प्रतिवन्ध लगाइएको छ ।

यस्तै खुला स्थानमा मानिसको भेला जम्मा हुन, भीडभाड गर्न, सभा, जुलुस, जात्रा, महोत्सव, भोजभत्तेर आदि गर्न पाइनेछैन भने शैक्षिक संस्थाहरुले पनि भौतिक उपस्थितिमा पठनपाठन गर्न गराउन नपाउने आदेशमा उल्लेख गरिएको छ ।