Date
शनि, फाल्गुन २२, २०७७
Sat, March 6, 2021

कविता : सूर्यको शुभकामना

चुँडिनु छ फूलले
झर्नु र ओइलिनु पनि छ,
तापनि निष्फिक्री फुलिरहेछ
सुन्दरताको सुवास छरिरहेछ ।

त्यस्तै,
झर्नु छ बादलका टुक्राले
तप्किनु र उछिट्टिनु पनि छ,
तापनि सगरमा निष्फिक्री घुमिरहेको छ
स्वतन्त्रताको आवाज बाँडिरहेको छ ।

अझ,
ठोक्किनु छ नदीका छालले
पोखिनु र जमिनु पनि छ,
तापनि निष्फिक्री दौडिरहेको छ
गन्तव्यको पाइला पछ्याइरहेको छ ।

र, साँच्चै
अस्ताउनु छ घामले
छेकिनु र देखिनुमा आक्रोशको पीडाले
पिल्सिनु पनि छ उसले
तापनि हरेक बिहानीमा उषाकिरण फालिरहेछ
शुभदिनको शुभकामना दिइरहेछ ।
नवीनताको नमन गरिरहेछ ।

– ओमकुमार श्रेष्ठ
(मावि तृतीय शिक्षक, झापा)

WRITE COMMENTS FOR THIS ARTICLE