विपक्षी गठबन्धनले भोली बिहान १० बजे संसद विघटनविरुद्ध रिट दायर गर्ने

९ जेठ, काठमाडौं– राष्ट्रपतिले गरेको संसद विघटनविरुद्ध विपक्षी दलहरु भोली(सोमबार) सर्वोच्चमा रिट हाल्ने भएका छन् । अदालतमा भोलि १० देखि ११ बजेसम्ममा रिट दायर गर्नेृ विपक्षी गठबन्धनका एक नेताले बताए ।

प्रधानमन्त्री केपी शर्मा ओलीको सिफारिसमा शुक्रबार मध्यरातमा संसद विघटन भएपछि राजनीति पुनः तातिएको छ । मध्यरातमा संसद विघटन गरेपछि विपक्षी दलले १४९ जना सांसदको हस्ताक्षरसहित सर्वोच्च अदालतमा रिट दिन लागेका हुन् । रिटमा धारा ७६(५) अनुसार १४९ जनाको हस्ताक्षरसहित बहुमतको प्रधानमन्त्री बन्न कांग्रेस सभापति देउवाले गरेको दाबी वैधानिक रहेको बताइएको छ।

यसअघि २०७७ पुस ५ गते प्रतिनिधि सभा विघटन गरिएको थियो । उक्त विघटन असंवैधानिक रहेको अदालतले संसदको पुनस्थापना गरेको थियो । सो कदम पश्चात प्रधानमन्त्री ओलीले संसदमा विश्वासको मत लिन चाहे पनि विश्वासको मत लिन सक्नुभएको थिएन । अल्पमतमा परेपछि प्रधानमन्त्री ओलीको सिफारिसमा राष्ट्रपतिले संविधानको धारा ७६(५) अनुसार नयाँ सरकार गठनका लागि बहुमत सहित दाबी गर्न आह्वान गर्नुभएको थियो । तर प्रधानमन्त्री केपी शर्मा ओली र कांग्रेस सभापति शेरबहादुर देउवा दुवै जनाले बहुमतको दाबी गरेपछि सोही मध्यराति प्रधानमन्त्री ओलीको सिफारिसमा राष्ट्रपति विद्यादेवी भण्डारीले संसद विघटन गर्नुभएको थियो ।

रिटको मस्यौदा आजै तयार गरी संघीय संसद भवन नयाँ वानेश्वरमा आई रिटमा सांसदहरुले हस्ताक्षर गरेका थिए ।