इराकसँगको मैत्रीपूर्ण खेलका लागि नेपाली फुटबल टोली आज इराक जाँदै

११ जेठ, काठमाडौं– नेपाली राष्ट्रिय फुटबल टोली इराकसँगको मैत्रीपूर्ण खेल, विश्वकप छनोट र २०२३ को एसियन कपको छनोट खेलका लागि आज इराक जाँदैछ । राष्ट्रिय फुटबल टोली राति १० बजे कतार एयरवेजबाट जान लागेको अखिल नेपाल फुटबल संघ एन्फाले जनाएको छ ।

नेपाली राष्ट्रिय टोलीमा २३ खेलाडी र १२ जना अफिसियल सहित ३५ सदस्यीय टोली इराक जान लागेको हो । टोलीसँगै राष्ट्रिय खेलकुद परिषद्का सदस्यसचिव रमेशकुमार शिलवाल पनि इराक जाने बताइएको छ ।

जेठ १५ गते नेपाल र इराकबीच हुने मैत्रीपूर्ण खेलपछि जेठ १६ गते नेपाली टोली स्थलमार्ग हुँदै कुवेत जानेछ। कुवेतमा विश्वकप र एसिया कप छनोटको खेल हुने जनाइएको छ । टोलीले जेठ २० गते चाइनिज ताइपेइ, जेठ २५ गते गते जोर्डन र जेठ २८ गते अस्ट्रेलियासँग खेल्नेछ।

यसअघि घरेलु मैदानमा खेल हुने तय भए पनि कोरोना भाइरसको महामारीका कारण न्युट्रल भेन्युका रूपमा कुवेतमा खेल हुन लागेको हो।

नेपाल ३ अंकसहित अंक तालिकाको चौथो स्थानमा छ। नेपालले ५ खेलमा १ खेलमा जित र ४ खेलमा हार बेहोरेको थियो। चौथो स्थानमा रहँदै खेल सकेको खण्डमा नेपालले एसियन कप छनोटको तेस्रो राउन्डमा सोझै स्थान बनाउनेछ ।

इराक जानु अघि गराइएको पीसीआर परीक्षणमा सबैको रिपोर्ट नेगेटिभ आएको छ । नेपाली राष्ट्रिय टोलीको आउने जाने खर्च फिफाले व्यहोर्ने एन्फाले जनाएको छ ।