निषेधाज्ञा उल्लंघन गर्ने २८ सय ७४ सवारी साधन नियन्त्रणमा

१९ जेठ, काठमाडौं– विभिन्न जिल्लामा लागू गरिएको निषेधाज्ञा कार्यान्वयनको क्रममा प्रहरीले निषेधाज्ञा उल्लंघन गर्ने २ हजार ८ सय ७४ वटा सवारी साधनलाई नियन्त्रणमा लिएको छ । नियन्त्रणमा लिएकामध्ये ६ सय ९५ वटा गाडी र २ हजार १ सय ७९ वटा मोटरसाइकल रहेको प्रहरीले जनाएको छ।

साथै नयाँ भेरियन्ट सहितको कोभिड–१९ संक्रमणको रोकथाम तथा जोखिम न्यूनीकरणका लागि नेपाल प्रहरीद्वारा संचालित ‘तपाईंको मास्क खोई ?’ कार्यक्रम अन्तर्गत पछिल्लो २४ घण्टामा ६ सय ४० जनालाई निःशुल्क मास्क वितरण गरेको प्रहरीले जनाएको छ ।

यस्तै प्रहरीले कोभिड–१९ रोकथाम तथा नियन्त्रणका मापदण्ड उल्लंघन गर्ने ५ सय ११ जनालाई कोभिड–१९ सङ्कट व्यवस्थापन अध्यादेश, २०७८ बमोजिम जम्मा ९५ हजार १ सय रुपैयाँ जरिवाना गरेको छ।

निषेधाज्ञा कार्यान्वयनलाई थप प्रभावकारी र सफल बनाउन नेपाल प्रहरीले अनुगमनलाई समेत तिब्रता दिएको छ ।