उपहारमा आएको ‘कोरोनिल किट’ वितरणमा रोक

२६ जेठ, काठमाडौं– आयुर्वेद तथा वैकल्पिक चिकित्सा विभागले पतञ्जलीको कोरोनिल किट वितरणमा रोक लगाएको छ । विभागले भारतीय योगगुरु रामदेवको पतञ्जली योगपीठले उत्पादन गरेको कोरोनिल किट् नेपालमा वितरण गर्न रोक लगाएको हो ।

कोरोनिल किट कोरोना भाइरसविरुद्ध प्रभावकारी भएको पर्याप्त प्रमाण नभेटिएको भन्दै विभागले वितरणमा रोकेको हो ।

त्यस्तै ती किट नेपालको औषधी व्यवस्था विभागमा दर्ता नभएको समेत विभागले जनाएको छ । गतसाता मात्र पतञ्जलीको तर्फबाट १५०० किट तत्कालीन स्वास्थ्यमन्त्री हृदयेश त्रिपाठीलाई बुझाइएको थियो ।

उक्त किट्ले स्वास्थ्यमा असर नपर्ने देखिएपनि विभागमा दर्ता नभएकाले वितरण नगर्ने निर्णय गरिएको विभागले बताएको छ । यसअघि भुटानले पनि कोरोनिल किट वितरणमा रोक लगाइसकेको छ ।