धितोपत्र बोर्डले निकालेको जोखिमपूर्ण कम्पनीको सूचीले सेयर बजारमा पहिरो, एकैदिन ५२.४१ अंकले घट्यो नेप्से

२ असार, काठमाडौं– धितोपत्र बोर्डले निकालेको विज्ञप्तीको प्रभाव सेयर बजारमा पर्दा सेयर बजारमा आज पहिरो गएको छ । दैनिक नयाँ उचाइ चुमिरहेको सेयर बजारमा साताको चौथो दिन बुधवार ५२.४१ अंकको गिरावट आएको हो ।

गत सोमबार ३ हजार विन्दू नाघ्दै नयाँ रेकर्ड बनाएको बजार बुधवार भने ओरालो लागेको हो ।

बुधबारको नियमित कारोवार अघि हुने प्रिओपन सेसनमा नै बजारमा ३२ अंकको गिरावट आएको थियो ।

मंगलबार झिनो अंकले ‘करेक्सन’ देखिए पनि नेप्सेले ३ हजार अंकको उचाइ पनि कायम राख्न सफल भएको थियो ।

नेपाल धितोपत्र बोर्डले मंगलबार सूचीकृत कम्पनीहरु मध्ये ५१ कम्पनीको नाम नै तोकेर जोखिमपूर्ण भन्दै लगानी जोखिममा पर्ने आशयको विज्ञप्ती जारी गरेपछि सेयर बजारमा एकैदिन भारी गिरावट भएका लगानीकर्ताहरु बताउँछन् ।

बजारमा आज कुल २ सय १९ कम्पनीको १५ अर्ब ४८ करोड भन्दा बढीको कारोवार भएको थियो ।