फिलिपिन्समा जहाज दुर्घटना हुँदा १७ को मृत्यु, ४० को उद्धार

एजेन्सी– फिलिपिन्समा आइतबार भएको हवाइ दुर्घटनामा परेका ४० यात्रुको उद्धार गरिएको छ ।

फिलिपिन्समा आइतबार फिलिपिनी सेनाको सी–१३० हर्कुलस जहाज दक्षिणी सुलु प्रान्तको जोलो टापुमा अवतरणका क्रममा दुर्घटनामा भएको थियो ।

उक्त दुर्घटनामा १७ जना सैनिकको मृत्यु भएको छ। मृत्यु हुनेको संख्या बढ्न सक्ने आशंका गरिएको द न्यूयोर्क टाइम्सले जनाएको छ ।

दुर्घटनामा परेकामध्ये अहिलेसम्म ४० जनाको उद्धार गरिएको छ। उद्धार गरिएकाहरूलाई अस्पताल लगिएको अन्तर्राष्ट्रिय सञ्चारमाध्यमहरुले जनाएका छन् ।

दुर्घटनामा परेपछि जहाजमा आगो लागेको थियो।

उक्त जहाजमा सवार अन्य सैनिकहरुको उद्धारका लागि प्रयास भइरहेको छ ।

फिलिपिन्सका सुरक्षा मन्त्री डेल्फिन लोरेन्जानाले उक्त जहाजमा तीन पाइलट र पाँच अन्य चालक दलसहित ९२ जना सवार रहेको समाचार संस्था रोयटर्सलाई बताएका छन्। यसअघि जहाजमा ८५ जना रहेको बताइएको थियो।