कोभ्याक्समार्फत अमेरिकाले उपलब्ध गराएको १५ लाख डोज खोप नेपाल आइपुग्यो

२८ असार, काठमाडौं– संयुक्त राज्य अमेरिकाले उपलब्ध गराएको जोनसोन एण्ड जोनसनको १५ लाख डोज खोप काठमाडौं आइपुगेको छ ।

अमेरिकाले कोभ्याक्समार्फत दिएको एक डोज मात्र लगाए हुने खोप काठमाडौं आइपुगेको हो ।

उक्त खोप कतार एयरवेजको नियमित उडानमार्फत ल्याइएको हो ।

त्रिभुवन अन्तर्राष्ट्रिय विमानस्थलमा बिहान ११ बजे आइपुगेको खोप अमेरिकी राजदूत र्‍याण्डी बेरीले स्वास्थ्य तथा जनसंख्यामन्त्री कृष्णगोपाल श्रेष्ठलाई हस्तान्तरण गर्नुभएको छ ।

हस्तानतरणका क्रममा अमेरिकी सरकारले उपहार स्वरुप दिएको खोप नेपाली नागरिकको जीवनरक्षाका लागि बरदान सावित हुने स्वास्थ्यमन्त्री श्रेष्ठले बताउनुभयो ।

उक्त खोप प्राथमिकताका आधारमा ५० देखि ५४ वर्षको उमेर समूहका नागरिकलाई लगाउने तयारी रहेको र कस्लाई दिने भनेर छिट्टै निर्णय गरि खोप अभियान सुरु गरिने उहाँले बताउनुभयो ।

उक्त खोप नेपाललाई अमेरिकाले कोभ्याक्स कार्यक्रममार्फत उपलब्ध गराएको हो ।

हस्तानतरणका क्रममा नेपालका लागि अमेरिकी राजदूत र्‍याण्डी बेरीले अमेरिकाले नेपाललाई १५ लाख ३४ हजार ८५० मात्रा खोप उपहारस्वरुप प्रदान गरेको जानकारी दिनुभयो ।