उपत्यकाको निषेधाज्ञा साउन १० गतेसम्मका लागि लम्बियो, काठमाडौं प्रवेशका लागि प्रशासनको पास नचाहिने

३१ असार, काठमाडौं– कोरोना संक्रमण रोकथामका लागि काठमाडौं उपत्यकामा जारी निषेधाज्ञालाई साउन १० गतेसम्मका लागि लम्ब्याइएको छ ।

उपत्यकाका तीन जिल्लाका प्रमुख जिल्ला अधिकारीहरुको बैठकले साउन १० गतेसम्मका लागि निषेधाज्ञा लम्ब्याउने निर्णय गरेको हो ।

बैठकले शुक्रबारदेखि काठमाडौं उपत्यकामा अत्यावश्यक कामले मात्र उपत्यकामा प्रवेश पाइने व्यवस्था गरेको छ ।

यद्यपि अब उपत्यका आउन जिल्ला प्रशासन कार्यालयको पास नचाहिने भएको छ ।

यसअघि उपत्यका प्रवेश गर्न प्रशासनको पास अनिवार्य गरिएको थियो ।

यस्तै सबै खालका पसलहरु बेलुका ७ बजेसम्म खुल्न पाउने भएका छन् भने अन्य आदेश र प्रावधानहरु साविककै कायम रहने काठमाडौंका सीडीओ कालीप्रसाद पराजुलीले बताउनुभयो ।