Date
बिहि, भदौ २, २०७९
Thu, August 18, 2022

स्थानीय तहमा ८० दल भिड्ने

१७ फागुन, काठमाडौँ – निर्वाचन आयोगमा स्थानीय तहको निर्वाचनका लागि ८० दलले निवेदन दिएका छन्। निर्वाचन आयोगमा यसअघि नै दर्ता भइसकेका दलले स्थानीय पालिकाहरूमा भाग लिनेगरी निवेदन दिएका हुन्। आगामी वैशाख ३० मा हुने स्थानीय तहको निर्वाचनका लागि आयोगले फागुन ५ देखि १५ सम्म निवेदन दिन आग्रह गरेको थियो।

आयोगमा निवेदन दिएका ८० दलले मात्रै देशैभरिका वडा, गाउँपालिका, नगरपालिका, उपमहानगरपालिका र महानगरपालिकामा निर्वाचन लड्न सक्नेछन्। आयोगमा दर्ता भएका राष्ट्रिय दलको मान्यता प्राप्त ६ पार्टीसँगै अन्य साना दलले निर्वाचनमा भाग लिने प्रयोजनका लागि निवेदन दिएका हुन्। आयोगमा ११० वटा राजनीतिक दल दर्तामा थिए।

एउटा थपिएपछि दलको संख्या १११ पुगेको छ। निर्वाचन आयोगमा २०७८ साउन १९ को निर्णयानुसार दर्ता रहेको नेपाः राष्ट्रिय पार्टी नामक राजनीतिक दल आयोगले दर्ता खारेज गरेको थियो। त्यसविरुद्ध सर्वोच्च अदालतमा रिट निवेदन दर्ता भएको थियो। सर्वोच्चले गत पुस २१ मा दल खारेज नगर्न अन्तरिम आदेश दिएको थियो। योसँगै साबिककै दल दर्ता कायम भएपछि दलको संख्या १११ पुगेको हो।

स्थानीय तह निर्वाचनका लागि आवश्यक मतपत्र छपाइ गर्न खरिद सम्झौतासमेत भएको छ। आयोगबाट फागुन १६ मा चुनावका लागि तयारी गर्न प्रधानमन्त्री तथा मन्त्रिपरिषद्को कार्यालयमा लेखिपठाउने निर्णय गरेको छ। २०७९ वैशाख १० सम्म कोभिड–१९ विरुद्धको पूर्ण खोप लगाउने व्यवस्था गर्न माग गरेको छ। त्यसैगरी स्थानीय तह सदस्य निर्वाचनका लागि प्रभावकारी सुरक्षा प्रबन्ध मिलाउन आग्रह गरेको छ। यो समाचार आजको नागरिक दैनिकमा छ ।

WRITE COMMENTS FOR THIS ARTICLE