एक साताका पुग्ने गरी खाद्यान्न किन्न उपत्यकाका सिडिओहरुको आग्रह

११ जेठ, काठमाडौं– उपत्यकाका तीन जिल्लाका प्रशासन कार्यालयले सर्वसाधाराणलाई एक हप्ताका लागि खाद्यान्न किनेर गरेर राख्न भनेका छन् । तीनै जिल्लाका प्रमुख जिल्ला अधिकारीहरुले थप कडाइ गर्दै एक साता निषेधाज्ञा बढाउने निर्णय गर्दै सर्वसाधारणलाई कम्तीमा एक साताका लागि खाद्यान्न सञ्चय गर्न अनुरोध गरेका हुन् ।

अधिकारीहरुले दुई दिन भित्र सम्पूर्ण सर्वसाधारणलाई खाद्यान्न समाग्री किन्न आग्रह गरेका हुन् । उपत्यकामा थपिएको निषेधाज्ञा अवधिमा किराना पसल तथा डिपार्टमेन्टल स्टोर पनि खोल्न नपाइने निर्णय गरिएको छ । तर तरकारी, माछामासु, दूग्धजन्य पदार्थ वितरण गर्ने पसल भने खुल्ला बिहान ९ बजेसम्म खोल्न दिने निर्णय भएको छ । बेलुका भने तरकारी पसल पनि बन्द गर्ने निर्णय गरिएको छ ।

थपिएको निषेधाज्ञा अघि दुई दिनको समय खाद्यान्न किन्नका लागि दिएको जनाएको छ । किराना पसल तथा डिपार्टमेन्ट स्टोरहरुमा भीडभाड अझै रहेकोले संक्रमण बढ्न नदिन बन्द गर्ने निर्णय गरिएको प्रशासनले जनाएको छ ।

यसैगरी बैंकहरुमा पनि भीडभाड बढेको भन्दै जिल्लाका शाखा बैंकको एक र वाणिज्य बैंकका दुई शाखा खोल्न अनुमति दिएको छ ।
सञ्चारकर्मीहरुको हकमा सूचना विभागको कार्ड अनिवार्य गरिएको छ । कार्ड नहुनेका लागि सञ्चार गृहको सिफारिसमा प्रशासनको अनुमति लिनुपर्ने व्यवस्था गरिएको छ ।