संसद विघटनले लोकतन्त्रमाथि खतराः देउवा

१० असार, काठमाडौं– नेपाली कांग्रेसका सभापति शेरबहादुर देउवाले संसद विघटनले लोकतन्त्रमाथि खतरा देखिएको बताउनुभएको छ ।

विपक्षी गठबन्धनले आयोजना गरेको पत्रकार सम्मेलनमा बोल्दै सभापति देउवाले मुलुकमा लोकतन्त्रमाथि नै खतरा देखिएको बताउँदै यसविरुद्ध संघर्ष गर्नुपर्ने बताउनुभएको हो ।

सम्पादकहरुसँगको अन्तरक्रियामा देउवाले १४९ सांसदको हस्ताक्षरसहित प्रधानमन्त्रीमाथि गरेको दावीलाई राष्ट्रपतिले अस्वीकार गरेर लोकतन्त्र नै धरापमा पार्ने काम गरिएको बताउनुभयो ।

सभापति देउवाले प्रधानमन्त्री ओलीको शासकीय अहंकार र स्वेच्छाचारी निर्णयका कारण संविधान धरापमा परेको बताउनुभयो । उहाँले ओलीले अध्यादेशमार्फत शासन चलाउन खोज्ने, न्यायालय, संवैधानिक निकाय र राज्य संयन्त्रहरु कब्जा जमाउन खोज्ने प्रवृत्ति देखाएको बताउनुभयो।

उहाँले भन्नुभयो, ‘संवैधानिक अंग कब्जा गर्न खोजिएको छ । अदालतले असंवैधानिक काम रोक्दै आएको छ ।’

सभापति देउवाले प्रधानमन्त्रीले सिर्जना गरेको चुनौती पार गर्न आवश्यक परेमा जनपरिचालन गर्न समेत सकिने बताउनुभयो।