युरोकपः स्पेन र क्रोएसिया भिड्दै, दोस्रो खेलमा फ्रान्स र स्विट्जरल्याण्ड आमनेसामने

१४ असार, काठमाडौं– युरो २०२० मा आज अन्तिम १६ का दुई खेल हुँदैछन् ।

आजको पहिलो खेलमा राति ९ः४५ बजे क्रोएसिया र स्पेनबीच कोपनहगेनमा सुरु हुनेछ ।

सुरुवाती दुई खेलमा गोलका लागि संघर्षरत टिमहरु तेस्रो खेलमा भने उत्कृष्ट गर्दै अन्तिम १६ मा प्रवेश गरेका हुन् । दुवै टिम अन्तिम १६ को खेलमा राम्रो प्रदर्शन गर्ने दाउमा हुनेछन् ।

लुका मोड्रिकको उत्कृष्ट गोलमा क्रोएसियाले समूह चरणको अन्तिम खेलमा स्कटल्यान्डलाई ३–१ गोलले हराएको थियो भने स्पेनले समूह चरणको अन्तिम खेलमा स्लोभाकियामाथि ५–० को फराकिलो जित दर्ता गरेको थियो ।

यस्तै आज हुने दोस्रो खेलमा विश्वविजेता फ्रान्स र स्विट्जरल्यान्ड आमनेसामने हुनेछन् । खेल राति १२ः४५ बजे बुचारेस्टमा सुरु हुनेछ।

समूह चरणमा पोर्चुगल, हंगेरी र जर्मनीविरुद्ध उत्साहजनक खेल नदेखाएको फ्रान्सले उत्कृष्ट प्रदर्शन देखाउने दाउमा रहेको छ ।

२०१८ को विश्वविजेता फ्रान्सले समूह चरणमा जर्मनीलाई आत्मघाती गोलको साहारामा हराउँदा हंगेरी र पोर्चुगलविरुद्ध बराबरी खेल्यो।

यता स्विट्जरल्यान्डले समूह चरणको अन्तिम खेलमा टर्कीविरुद्ध ३–१ को जित निकालेर उत्कृष्ट तेस्रो टिमको रुपमा अन्तिम १६ मा प्रवेश गरेको थियो ।

‘हेड टु हेड’ का आधारमा हेर्दा फ्रान्सले स्विट्जरल्यान्डसँग अहिलेसम्म पराजय भोग्नु परेको छैन। दुई खेलमा फ्रान्स विजयी हुँदा चार खेल बराबरीमा सकिएका छन्।