बाँसको डण्डा प्रयोग गरी हत्या गरेको आरोपमा पक्राउ

३१ असार, काठमाडौं– बाँसको डण्डा प्रहार गरी हत्या गरेको अभियोगमा प्रहरीले कञ्चनपुरबाट एक जनालाई पक्राउ गरेको छ ।

बाँसको डण्डा प्रहार गरी भिमदत्त नगरपालिका(१० तिल्केनी बस्ने ४२ वर्षीय बिर राम लुहारको हत्या गरेको अभियोगमा सोही ठाउँ बस्ने २२ वर्षीय गिरधारी लुहार पक्राउ परेका हुन् ।

उनलाई प्रहरीले बुधबार साँझ पक्राउ गरेको हो ।

आपसी झगडाको कारण गिरधारीले बाँसको डण्डा प्रहार गर्दा बिर राम गम्भीर घाइते भएको खबर पाउनासाथ जिल्ला प्रहरी कार्यालय र प्रहरी चौकी जिमुवाबाट खटिएको संयुक्त प्रहरी टोलीले गिरधारीलाई पक्राउ गरेको हो ।

डण्डा प्रहारबाट घाइते भएका घाइतेलाई महाकाली प्रादेशिक अस्पतालमा उपचार गर्दागर्दै मृत्यु भएको प्रहरीले जनाएको छ ।

यस विषयमा प्रहरीले थप अनुसन्धान गरिरहेको छ ।