कोपा अमेरिकामा आज दुई खेल हुँदै, पहिलो खेलमा दुई उपाधि दाबेदार आमनेसामने हुँदै

३१ जेठ, काठमाडौं– कोपा अमेरिका फुटबल प्रतियोगितामा आज दुई खेल हुँदैछन् ।

दुई खेलमध्ये पहिलो खेलमा फुटबलप्रेमीमाझ लोकप्रीय मेस्सीको नेतृत्वमा रहेको अर्जेन्टिनाले बलियो दाबेदार चिलीको सामना गर्दैछ भने आजै हुने दोस्रो खेलमा पाराग्वेले बोलिभियाको सामना गर्दैछ ।

नेपाली समयअनुसार पहिलो खेल मंगलबार बिहानै २ः४५ देखि सुरु हुनेछ भने दोस्रो खेल बिहान ५ः४५ देखि सुरु हुनेछ ।

दुई खेलमध्ये पहिलो खेलमा धेरै दर्शकको नजर रहेको छ । आजको पहिलो खेलमा मैदानमा उत्रिन लागेका टोलीमध्ये दुवै टोली दाबेदार टोली हुन् ।

यी दुवै टोली २०१५ र २०१६ को कोपा अमेरिकाको फाइनलमा आमनेसामने भएका थिए । जसमा दुवै पटक चिलीले उपाधि जित्न सफल भएको थियो ।

यस्तै अर्जेन्टिनाले पनि यस उपाधि सुरुभय यता १४ पटक हात पारिसकेको छ ।

यसअघि सोमबार बिहान भएका उद्घाटन खेलमा आयोजक ब्राजिलले भेनेजुयलामाथि ३–० को जित निकालेको थियो । यस्तै अर्को खेलमा कोलम्बियाले इक्वेडरलाई १–० ले पराजित गरेको थियो ।