भौतिक उपस्थितिमा एसईई परीक्षा हुने सम्भावना न्यूनः शिक्षामन्त्री श्रेष्ठ

१० जेठ, काठमाडौं– शिक्षा विज्ञान तथा प्रविधिमन्त्री कृष्णगोपाल श्रेष्ठले यस वर्षको एसईई परीक्षा भौतिक रुपमा गर्ने सम्भावना न्यून रहेको बताउनुभएको छ । उहाँले भौतिक रुपमा परीक्षा गर्ने सम्भावना न्यून रहेकोले अहिले विभिन्न विकल्पमा छलफल भइरहेको बताउनुभयो ।

आज एमाले निकट विद्यार्थी संगठन अनेरास्ववियूको ज्ञापन पत्र बुझ्दै मन्त्री श्रेष्ठले एसईई र कक्षा १२ को परीक्षाका विषयमा अहिले छलफ गर्न मन्त्रालयले कार्यदल बनाएको बताउनुभयो । कार्यदलले अहिले आफ्नो काम गरिरहेको र यसै साता नै कार्यदलले प्रतिवेदन बुझाउने उहाँले बताउनुभयो । कार्यदलले दिएको सुझावका आधारमा मन्त्रालयले निर्णय लिने उहाँको भनाइ थियो ।

मन्त्री श्रेष्ठलाई ज्ञापन–पत्र बुझाउदै अनेरास्ववियूका अध्यक्ष ऐन महरले विद्यालय तहको परीक्षा वैकल्पिक विधिबाट तत्काल सम्पन्न गरी असार १ गतेदेखि नया शैक्षिक सत्र शुरु गर्न माग गर्नुभयो ।

ज्ञापन पत्रमा भौतिक उपस्थितिमा पढाइ नहुँदासम्मको अवधिको शुल्क मिनाहा गर्नुपर्ने, विद्यालय तहको परीक्षा वैकल्पिक विधिबाट तत्काल सम्पन्न गर्नुपर्ने, असार १ गतेदेखि नया शैक्षिकसत्र शुरु गर्नुपर्ने लगाएतका माग राखिएको छ ।