उपत्यकामा जारी निषेधाज्ञा जेठ मसान्तसम्म लम्बियो, जेठ २० पछि केही क्षेत्र खुकुलो

१९ जेठ, काठमाडौं– काठमाडौं उपत्यकामा जारी निषेधाज्ञा जेठ मसान्तसम्म लम्ब्याइने भएको हो । उपत्यकाका तीनै जिल्ला काठमाडौं, ललितपुर र भक्तपुरका प्रमुख जिल्ला अधिकारी सीडीओहरुको बैठकले जारी निषेधाज्ञा जेठ मसान्त सम्मलाई लम्ब्याउने निर्णय गरेको हो ।

उपत्यकामा यसअघि थपिएको निशेधाज्ञाको अवधि जेठ २० गते सकिँदैछ । जेठ १४ बाट थप गरिएको निषेधाज्ञामा सो आदेशलाई कडाइ गर्दै किराना पसल र डिपार्टमेन्ट स्टोरसमेत बन्द गरिएको थियो ।

तर, अहिले थपिएको निषेधाज्ञामा किराना पसल र डिपार्टमेन्ट स्टोर भने खोल्न दिने निर्णय भएको छ । किराना र डिपार्टमेन्ट स्टोरलाई बिहान ९ बजेसम्म खोल्न दिने निर्णय भएको एक अधिकारीले बताए ।

यस्तै फलफूल र पुस्तक पसल पनि बिहान ९ बजेसम्म खोल्न दिने निर्णय भएको उनले बताए । साथै विकास निर्माणका काम पनि खुला गरिएको छ । यद्यपि निर्माण सामाग्रीको ढुवानीका लागि भने रातिको समय मात्र दिइएको उनले बताए ।

उनका अनुसार अन्य कार्यका लागि भने यसअघिकै नियम लागू हुने निर्णय भएको छ ।

उपत्यकामा केही खुकुलो बनाइएको निषेधाज्ञा अघिल्लो निषेधाज्ञाको अवधि सकिएपछि मात्र लागू हुनेछ । यसअघि उपत्यकामा जेठ २० गतेसम्मका लागि जारी गरिएको थियो ।