विवादको भुमरीमा फसेको एमालेको कलह मिलाउन दुवै पक्षका दोस्रो तहका नेता समिट होटलमा छलफलमा

२५ जेठ, काठमाडौं– एमाले विवाद समाधानका लागि एमालेका दोस्रो तहका नेताहरु फेरि सक्रिय भएका छन् । नेकपा एमालेका अध्यक्ष केपी शर्मा ओलीले गरेको एकता प्रस्ताव माधवकुमार नेपाल समूहले अस्वीकार गरेपछि दोस्रो तहका नेताहरु विवाद समाधानका लागि पुन लागेका हुन् ।

एमालेको दुवै समूहका दोस्रो तहका नेता पार्टी विवाद मत्थर पार्न जुटेका हुन्। हिजो राति नेपाल पक्षले एकता प्रस्ताव अस्वीकार गरेसँगै ओली र नेपाल पक्षका दोस्रो तहका नेताहरुबीच अहिले ललितपुरको समिट होटलमा वार्ता सुरु भएको हो।

उक्त वार्तामा ओली पक्षबाट सुवास नेम्वाङ, विष्णु पौडेल र प्रदीप ज्ञवाली सहभागी छन्। वार्तामा नेपाल पक्षबाट भने सुरेन्द्र पाण्डे र गोकर्ण विष्ट सहभागी रहेका छन्। आजको वार्तामा घनश्याम भुसाल र योगेश भट्टराई सहभागी छैनन्। भट्टराई आज बिहानै हाइकिङ गएका कारण छलफलमा अनुपस्थित छन्।

एमाले विवाद मिलाउन प्रधानमन्त्री ओलीले आइतवार राति ६ बुँदे सहमतिको प्रस्ताव पेश गरेका थिए। यद्यपि नेपाल पक्षले ओलीले अल्मल्याउन उक्त कार्ड खेलेको बताउँदै अस्वीकार गरेका थिए ।

एकता प्रस्ताव अस्वीकार गरेको नेपाल समूहले मंगलबार सुदूरपश्चिम प्रदेशमा माओवादीका मुख्यमन्त्री त्रिलोचन भट्टलाई विश्वासको मत दिएको छ । केन्द्रको निर्देशन अवज्ञा गर्दै नेपाल पक्षीय सांसदहरुले मुख्यमन्त्री भट्टको पद जोगादिएका छन् ।

यस लगत्तै दुवै समूहका दोस्रो तहका नेताहरुको वार्ता सुरु भएको हो ।